Xəbər "Hər qalibiyyətdən sonra məsuliyyətimiz daha da artır" - “Qarabağ”ın direktoru

"Hər qalibiyyətdən sonra məsuliyyətimiz daha da artır" - “Qarabağ”ın direktoru

Müəllif: Xeberim.az on in İdman
1st Image
“Qarabağ”ın direktoru Əmrah Çəlikəl Çempionlar Liqasının üçüncü mərhələsinin “Şerif”ə qarşı matçından sonra Qol.az saytına müsahibə verib. Modern.az həmin müsahibəni təqdim edir:

- Əvvəlcə bu parlaq qələbə münasibəti ilə sizi təbrik edirik. İlk təəssüratlarınız necədir?

 

- Vallah, ancaq qürur duyuruq. Amma hər qalibiyyətdən sonra məsuliyyətimiz daha da artır. Bundan sonra daha diqqətli olmalıyıq. Düzdür, bugünkü qələbə bir tarixdir. Amma qarşımıza qoyduğumuz hədəfə hələ çatmamışıq. Qurban müəllimi, oyunçularımızı, rəhbərliyimizi təbrik edirəm.

Bundan sonrakı hədəfimiz Çempionlar Liqasının qrupudur. Birinci missiyamızı tamamladıq. İndi qarşıda bizi ağır pley-off mərhələsi gözləyir.

 

- Pley-offdan gözləntiniz nədir?

 

- Həmişə demişik. Bu, Çempionlar Liqasıdır və burada çempionlar oynayır. Rəqib zəif olmayacaq.

 

- Dediniz ki, hədəfiniz qrupdur. Amma bütün futbol ictimaiyyəti qrupa düşmək üçün “Qarabağ”dan yenə yeni transferlər gözləyir.

 

- Bəli, bu məsələ həmişə müzakirə olunur. Amma gördüyünüz kimi, Qurban müəllimin etdiyi transferlər uğurlu olub. Bizim məsuliyyətimiz böyükdür. Biz komandaya hər oyunçunu gətirə bilmərik. Görürsən ki, bəzən hətta bizim maraq dairəmizdə olmayan oyunçuların da adı “Qarabağ”la hallanır. Transferlərimiz fərqli və səviyyəli olmalıdır. Qurban müəllim futbolçu axtarır, istədiyini tapanda o transferin gerçəkləşməsi üçün rəhbərliyimiz dəstək verir, bundan sonra da verəcək. Gərək transferlərimiz layiqli olsun. Belə futbolçu olanda komandaya cəlb edəcəyik.

 

- Sonda azarkeşlərə sözünüz...

 

- Bütün Azərbaycanı və azarkeşlərimizi təbrik edirəm. Bundan sonra hamımızın məsuliyyəti böyükdür. Azarkeşlərimizdən bunu başa düşmələrini istəyirəm. Onlar bizə həmişə inanıblar. Biz birlikdə bu uğurlara nail olmuşuq. Bundan sonra da onların dəstəyi ilə daha böyük uğurlar qazanacağımıza inanıram.