Ötən əsrin sonlarında dövlət müstəqilliyini bərpa edən
Azərbaycanın xarici siyasətinin əsas prioritetlərindən biri beynəlxalq birliyə daxil olan ölkələrlə münasibətlərin qurulması olmuşdur. Ölkəmiz bu münasibətlərin qurulmasında ilk növbədə milli maraqların qorunmasını təmin etməyə çalışmışdır. Əsası Ulu Öndər Heydər Əliyev tərəfindən qoyulmuş və cənab Prezident İlham Əliyev tərəfindən uğurla davam etdirilən xarici siyasətin məntiqi nəticəsidir ki, hazırda ölkəmiz dünyada öz layiqli yerini tutmuşdur. Xüsusilə son illərdə ölkəmizin dünyanın aparıcı dövlətləri və beynəlxalq təşkilatları ilə əlaqələri sıx əməkdaşlıq şəraitində inkişaf etməkdədir.
Möhtərəm cənab Prezident İlham Əliyevin mütəmadi xarakter almış rəsmi və işgüzar səfərləri ölkəmizin beynəlxalq aləmə inteqrasiyasını sürətləndirmiş, eyni zamanda ikitərəfli əlaqələrin möhkəmləndirilməsi baxımından mühüm əhəmiyyət kəsb etmişdir. Cari ilin 13 mart tarixində Azərbaycan Respublikasının Prezidenti İlham Əliyev cənablarının Almaniyaya növbəti səfəri bu baxımdan xüsusilə əhəmiyyətli olmuşdur. Səfər çərçivəsində dövlətimizin başçısı Almaniyada hökumət və dövlət başçıları ilə keçirdiyi görüşlərlə yanaşı bu ölkənin aparıcı şirkətlərinin rəhbərləri ilə də mühüm görüşlər keçirmişdir. Martın 13-də Berlində Almaniyanın aparıcı şirkətlərinin rəhbərləri ilə keçirilən görüşdə çıxış edən İlham Əliyev cənabları Azərbaycanla Almaniya, eyni zamanda Azərbaycanla Avropa İttifaqı arasında mövcud əlaqələrin inkişafından və qarşıya qoyulmuş vəzifələrdən bəhs etdi. Cənab Prezident xüsusilə son illərdə ölkəmizin Avropa İttifaqı ilə strateji tərəfdaşlıq səviyyəsinə qədər yüksəlmiş əlaqələrindən məmnunluğunu bildirmiş, ikitərəfli əlaqələrin daha da genişləndirilməsi üçün geniş imkanların mövcudluğunu iştirakçıların nəzərinə çatdırmışdır.
Qeyd etməliyik ki, Azərbaycan Respublikası son illərdə beynəlxalq təşkilatların işində fəal iştirak edərək milli maraqlarını qlobal səviyyədə müdafiə edir. Məhz bu istiqamət dövlətimiz tərəfindən yürüdülən balanslaşdırılmış və milli maraqlara söykənən xarici siyasət xəttinin əsasını təşkil etməkdədir. Ölkəmizin belə əməkdaşlığın inkişafına böyük önəm verdiyi nüfuzlu təşkilatlardan biri də Avropa İttifaqıdır. Sevindirici haldır ki, Avropa İttifaqı ilə 1993-cü ildə əsası qoyulmuş münasibətlər son illərdə qarşılıqlı maraqlar əsasında yüksələn xətlə inkişaf etməkdədir.
Avropa İttifaqı Azərbaycana regionun lider dövləti kimi yanaşır və respublikamızda həyata keçirilən iqtisadi – siyasi və hüquqi islahatları yüksək qiymətləndirir. Qarşılıqlı rəsmi səfərlər və imzalanmış mühüm sazişlər nəticəsində əlaqələrimiz daha da dərinləşməkdədir. Son illərdə ikitərəfli qarşılıqlı səfərlər və əldə edilən anlaşmalar münasibətlərimizin inkişafında böyük rol oynamışdır. Xüsusilə ötən ilin iyul ayında imzalanmış “Enerji sahəsində Strateji Tərəfdaşlığa dair Anlaşma Memorandumu” olduqca böyük əhəmiyyət kəsb edir. Bu Memorandum nəticəsində Avropa İttifaqının enerji təhlükəsizliyinin təmin edilməsində Azərbaycanın rolu daha da artacaqdır.
Azərbaycan dövlətinin Avropa İttifaqı ilə əlaqəlarinin əsasında enerji məsələləri ilə yanaşı digər sahələrin inkişafı da dayanır. Azərbaycan dövləti üçün Avropa İttifaqı ilə münasibətlər olduqca vacibdir, çünki biz istəyirik ki, həyatımızın bütün meyarları Avropa İttifaqının meyarlarına uyğun olsun. Möhtərəm cənab Prezidentin də qeyd etdiyi kimi “hazırda Avropa İttifaqı ilə bütün sahələrdə əlaqələrimiz çox möhkəmdir və bu ikitərəfli maraqlara əsaslanan münasibətlərimizin böyük gələcəyi vardır”.
Aqşin Ağayev – Siyəzən Rayon İcra Hakimiyyəti başçısının müavini
